Супермени, принцези, цвеќиња, колачиња, кловнови, пчелички и многу други маскирани дечиња дефилираа денеска низ Скопје на Денот на шегата. Првоаприлските маски уште еднаш ја покажа креативноста на родителите и на децата, особено детската желба барем еден ден да бидат јунаци од нивната фантазија или некој омилен лик од детските приказни и филмови.

Четири општини и тоа Ѓорче Петров, Кисела Вода, Гази Баба и Бутел се погрижија за највеселиот детски ден да обезбедат и многу забава, музика, но и награди за најдобрите маски.

На манифестацијата „Шеговил“ во Кисела Вода, која се одржа пред салата „Расадник“ се собраа повеќе од 1.000 маскирани деца, за кои беше организиран и забавен парк со вртелешки. Градоначалникот Орце Ѓорѓиевски посочи дека жири-комисијата имала навистина тешка задача од прекрасните маски да ги избере трите најдобри, за кои беше обезбеден таблет и слатки пакети.

Креативни, оригинални, одлични маски денеска продефилираа и во централниот парк во Ѓорче Петров на „Априлијадата“, која Општината ја организираше во соработка со училиштата и градинката.

Најважно од сѐ е што видов многу весели дечиња на едно место. Особено ми е драго што повторно ги усреќивме нашите најмлади жители за кои ја приредивме оваа манифестација, затоа што за мене како градоначалник, но и како родител, нема поголема радост од насмеани млади лица – посочи градоначалникот на Ѓорче Петров, Александар Стојкоски.

За жал, годинава потфрли Град Скопје и градоначалничката Данела Арсовска, па изостана традиционалната Априлијада на Градскиот плоштад. Оттаму не одговорија на прашањата зошто градското раководство ништо не организираше за Денот на шегата, денот кога Скопје живее и се радува поради детските насмевки.
Сепак, тоа не ги спречи родителите, па дури и некои градинки и училишта да ги прошетаат маскираните дечиња на градскиот плоштад каде што ги развеселија минувачите, но за нив немаше никаква забава, па им преостана само да свртат круг на плоштадот и да ги покажат своите маски.

Можеби догодина Градот ќе се сети навреме дека и најмладите жители заслужуваат внимание, барем на нивниот омилен Ден на шегата.