Во Бугарија започна продукцијата на биографскиот филм „Maria“ за најголемата оперска дива на сите времиња, Марија Калас. Магазинот „Вараети“ ги објави првите фотографии од сетот на кој можеме да ја видиме Анџелина Џоли во главната улога.

Режисер на филмот е Пабло Ларин, кој ги режираше филмовите номинирани за Оскар, „Jackie“ и „Spencer“. „Maria“ ќе биде последниот филм од режисерската трилогија биографски филмови за влијателни жени од минатото.

Според официјалниот опис на претстојниот биографски филм, приказната ќе го следи животот на легендарната и контроверзна пејачка, а во фокусот на филмот ќе бидат нејзините последни денови поминати во Париз во 1970-тите.

Сценариото за филмот го напиша Стивен Најт, креаторот на хит-серијата „Peaky Blinders“, а покрај Анџелина Џоли, во филмот играат и Пјерфранческо Фавино, Алба Рорвачер, Халук Билгинер, Коди Смит-Мекфи и Валерија Голино. 

 „Многу сум возбуден поради почетокот на продукцијата на филмот, кој се надевам дека ќе ги доближи извонредниот живот и дело на Марија Калас до публиката ширум светот, благодарение на прекрасното сценарио на Стивен Најт и работата на актерите и целата филмска екипа – особено Анџелина Џоли, која се подготви прекрасно“, изјавил Ларин.