Во екот на сезоната на награди, вечерта посветена на актерските остварувања уште еднаш потврди дека модата и филмот одат рака под рака. Наградите на Здружението на филмските актери не беа насочени само кон признанијата, туку и кон внимателно одбраните модни комбинации на славните личности. Како што сезоната на награди се приближува кон својата кулминација, црвениот тепих на оваа свеченост се наметна како елегантна модна увертира за самата завршница.

Ова беше првото издание на наградите со пропишан начин на облекување за црвениот тепих – реинтерпретација на холивудскиот гламур од дваесеттите и триесеттите години на минатиот век.

Чии модни изданија беа најочекувани?

Неколку дена пред самата свеченост, организаторите го објавија списокот на презентери, па јавноста веќе имаше претстава што може да очекува. Некои имиња особено го привлекоа вниманието, бидејќи и претходно блескале на вакви настани.

Меѓу нив беа новите и впечатливи актерски лица како Конор Стори, Чејс Инфинити и Џена Ортега, но и ѕвезди со долгогодишен углед во филмската индустрија. Посебно се истакна Харисон Форд, кој ја прими наградата за животно дело.

Црвениот тепих и дизајнерските имиња

Ниту овојпат не изостанаа раскошни креации од врвни модни куќи. Гвинет Палтроу се појави во креација од „Живанши“ (Givenchy), Тејана Тејлор во „Том Браун“ (Thom Browne), а Деми Мур во „Скијапарели“ (Schiaparelli). Џена Ортега избра елегантен свилен фустан од „Кристијан Кован“ (Christian Cowan).

Ема Стоун се појави во креација од „Луј Витон“ (Louis Vuitton), Сара Пиџон во „Баленсијага“ (Balenciaga), а Кејт Хадсон во „Валентино“ (Valentino). Дамите блеснаа во гламурозни и внимателно осмислени изданија, во духот на зададената тема.

Кога станува збор за машката мода, познатите актери повторно се одлучија за проверена елеганција. Тимоти Шаламе носеше одело од „Прада“ (Prada), додека Конор Стори се појави во креација од „Сен Лоран“ (Saint Laurent).