Денеска пред Клиничката болница во Битола се одржа третиот протестен митинг во знак на протест поради ненадејната смрт на шестгодишната Јана Христовска и на новороденчето кое почина кусо по раѓањето.

Откако со пуштање на сирената за аларм, со која симболично беше прогласена узбуна за состојбите во Битолската болницa, и со едноминутно молчење им беше оддадена почит на малата Јана и новородечето, организаторот на протестот Игор Петковски рече:

„И покрај тоа што помина толку време од смртта на Јана, сѐ уште не се утврдени причините, од што почина Јана. Обдукцијата сѐ уште не е завршена, што ни дава за право да се сомневаме дека нешто не е во ред. Нам ништо не ни значи оставката на директорот на болницата. Надлежните здравствени служби досега не ги контактирале ниту родителите на Јана, ниту нас. Ние Јана не можеме да ја вратиме меѓу живите, но нема да се откажеме додека не се утврди вистината за нејзината смрт. Постојано добиваме информации од странски лекари коишто се врвни медицински стручњаци и даваат нивни видувања за смртта на Јана“.