Ако патувате во Анталија, Турција и сте човек со истражувачки, но и авантуристички дух, тогаш Античкиот град Олимпос, кој бил дел од областа Ликија, би бил идеално место за вас.

Овој град се наоѓа на морскиот брег, близу до Сирали, Кумлуца, на 70 километри од Анталија, на јужната страна од планината Тахтали, а бујното зеленило и суптропските клими го прават Олимпос турскиот обид за Тајланд.

Со својата хипи атмосфера, сместување во куќи на дрвја и плажи покрај антички урнатини, можете да добиете вкус на пламенот на вечна младост.

„Слободен печат“ имаше прилика да го искуси овој хипи дух, да научиме малку историја, да уживаме во убавините на една епска плажа, но и да стигнеме со жичница до врвот на Ликијскиот Олимп.

Вгнезден меѓу природната позадина на медитеранскиот брег на провинцијата Анталија, Олимп е боемско светилиште полно со бунгалови на дрвосади и урнатини на Ликија, па ако сте во потрага по авантура и еден одмор за паметење, тогаш дефинитивно ова е местото за вас.

Кога ќе се упатите кон плажата најпрво ќе здогледате фасцинантни куќички на дрвја, а поради својата природна и исторска важност, оваа област е под заштита што ја прави земен рај.
Оваа заштита значи дека тоа се одмаралишта без луксузни хотели, но слатки мали колиби и куќи од дрва наместо нив.

Се тоа e претставено во хипи стил, со луѓе кои овде живеат, ги издаваат тие колиби, произведуваат најразлични глинести и секаков вид на други предмети, ќе се запознаете со една поинаква култура, а и веднаш ќе добиете желба да останете овде, барем на неколку дена.

Кога ќе останете воодушевени од волшебните куќички, доаѓате речиси пред самата плажа, ќе поминете низ остатоците од некогашниот антички град Олимпос, но интересно е тоа што тоj претставувал огромен град и еден од најважните на античката цивилизација на Ликијците во минатото и има значајно место во поморската трговија.

Како што можевме да слушнеме од локалниот водич, ниту историчарите не се сосема сигурни за точниот датум кога градот е основа, но она што може да се потврди е дека датира од Хеленистичкиот период.

Како еден од шесте градови со право на глас во Ликијската лига, Олимпос имал огромно значење и статус, но позицијата покрај крајбрежјето, исто така, овозможувала често да биде мета на напади од страна на пирати. 

На крајот, Ликијската лига била апсорбирана во Римското Царство и Олимпос паднал под нивна сопственост, пред да биде напуштен во текот на 15 век.

И откако научивме дел од историјата на градот, ја почувствуваме хипи културата, дојде ред да ја почувствуваме и убавината на навистина прекрасната плажа и да се разладиме во море, по што се впуштивме во уште една незаборавна авантура.

Наоѓајќи се веќе далеку од центарот на градот во Анталија и освежени од водите на Средоземното море, во буквална смисла го исполнивме сонот на секој човек, а тоа е да се стигне до врвот на Олимп, овојпат со помош на жичница до самиот врв на Ликијскиот Олимп, на 2,365 метри надморска височина.

Додека се возите по жичницата уживате во убавините на планината Тахтали, го гледате морето и имате неверојатно енергија, но доколку се одлучите на ова, препорачливо е да си земете јакна, бидејќи температурата на врвот изнесува 10 степени Целзиусови!

Патувањето до врвот на планината трае приближно 10 минути и нуди фантастичен поглед во текот на турата, од пошумени планини до снежни падини во зима.

На платформата имате и ресторан, каде можете да се опуштите, да пиете кафе и да уживате во неверојатни глетки, а доколку сакате искуството да биде комплетно, можете да се одлучите и за параглајдинг или банџи-скокање!