Македонскиот пејач Даниел Кајмакоски ноќеска бил киднапиран во близина на Бетон хала во Белград, потврди неговиот претставник за односи со јавноста, Миланка Рашиќ. Како што се наведува во официјалното соопштение, Кајмакоски е во добра здравствена состојба, ноќта ја поминал во полиција, а утрово е пуштен дома.

Според досегашните информации, непознати сторители, за кои се сомнева дека се странски државјани, го врзале и го одвеле пејачот во неговиот автомобил, барајќи од него 20.000 евра. Возилото се движело во правец на Рума, кога сообраќајната полиција се обидела да ги запре. При обидот за бегство, автомобилот удрил во банкината, по што киднаперите излегле од возилото и избегале.

По инцидентот, Кајмакоски поминал неколку часа во полициска станица, додека траела постапката и увидот на надлежните служби. Полицијата интензивно трага по сторителите.

Од неговиот тим информираат дека пејачот смирено и храбро се соочил со ситуацијата, но во моментов му е потребен мир. Во интерес на истрагата, тој нема да дава изјави за јавноста.

„Им благодариме од срце на сите добри луѓе кои се јавија и покажаа грижа за Даниел“, се наведува во соопштението од неговиот претставник за односи со јавноста Миланка Рашиќ.

ВИДЕО | Даниел Кајмакоски е киднапиран во Белград – српската полиција е на нозе