ФОТО: Незаборавната венчаница на принцезата Дајана за првпат изложена во палатата Кенсингтон
Венчаницата на принцезата Дајана за прв пат е изложена во палатата Кенсингтон, откако нејзините синови, принцот Вилијам и принцот Хари, се согласиле да го „позајмат“ легендарниот и незаборавен фустан од 1981 година…
Дајана на венчавката со принцот Чарлс во катедралата Сент Пол во 1981 година го носеше гламурозниот невестински фустан, кој беше украсен со превез од дури 7,5 метри.
Јавноста од овој месец ќе има можност да ја види венчаницата на покојната принцеза Дајана во кралската резиденција во западен Лондон.
Фустанот, дизајниран од Елизабет и Дејвид Емануел, е украсен со светки, бисери и чипка кои првично ѝ припаѓале на кралицата Мери.
Нежно заобленото деколте и големите надуени ракави ги красат раскошни машни од тафт – стил популаризиран од принцезата во раните 1980-ти. Фустанот е во сопственост на синовите на Дајана, принцовите Вилијам и Хари, кои во оваа прилика го „позајмија“ за изложбата.
Насловен како „Royal Style in the Making“ овој настан ќе се осврне на темата за односот помеѓу дизајнерите и нивните кралски клиенти.
На изложбата ќе биде прикажана и ретка ткаенина која е зачувана од 1937 година и била искористена за да се направи фустан за крунисување на кралицата Елизабета Втора.
Модните комбинации на принцезата Дајана биле внимателно следени и документирани, и пред и по нејзиниот брак со Чарлс.
Модните избори и додатоци на Дајана се актуелни и денес, а за тоа најдобро зборува фактот дека во март Меган Маркл, војвотката од Сасекс, носеше нараквица од Дајана за време на разговорот со Опра Винфри.