Македонскиот напаѓач Илија Несторовски зад себе има одличен викенд во кој постигна два гола за Славен Белупо во убедливата победа од 4-1 над Вуковар.

Несторовски ги одигра сите 90 минути и беше најистакната фигура на теренот, што му донесе и место во идеалниот тим на колото во хрватското првенство.

Првиот гол прилепчанецот го реализира во 25. минута за водство од 2-0, а вториот го додаде околу десет минути пред последниот свиреж, потврдувајќи ја победата на својот тим.

Сезонава Славен Белупо игра одлично во хрватското првенство и со 21 бод по 14 кола се наоѓа на третата позиција зад лидерот Хајдук (29) и второпласираниот Динамо (28).

Преземено од: Спорт.ком.мк