Фотографии од над 250 кучиња пронајдени во една куќа во Велика Британија предизвикаа неверување кај јавноста, до тој степен што многумина помислија дека станува збор за слики создадени со вештачка интелигенција.

Сепак, организацијата за заштита на животни, Кралско друштво за спречување суровост кон животните, RSPCA потврди дека сцените се целосно вистински и дека станува збор за една од најшокантните акции за спасување во последните години, пренесува „Гардијан“.

Од вкупно пронајдените кучиња, 87 биле згрижени од оваа организација, додека останатите биле преземени од друга добротворна организација за заштита на животни. Дел од фотографиите прикажуваат десетици кучиња стуткани во една дневна соба, живеејќи во нехумани и запоставени услови.

По објавувањето на фотографиите, многу луѓе на социјалните мрежи ја обвинија организацијата дека користи вештачка интелигенција за да ги создаде сликите. Но, од таму нагласија дека реалноста е дури и пострашна од тоа што изгледа.

„Разбираме дека луѓето се шокирани и тешко веруваат во тоа што го гледаат, но ова не е вештачка интелигенција – ова е реалност“, изјави претставничка на организацијата.

Според нив, сопствениците изгубиле контрола врз размножувањето на кучињата, кои биле мешанци со пудлица, по што ситуацијата брзо излегла од контрола. Иако условите биле крајно лоши, сопствениците биле оценети како „исклучително ранливи“, па против нив не била покрената кривична постапка.

Експертите посочуваат дека ваквите случаи често се поврзани со психолошки проблеми, економски тешкотии или неодговорно одгледување. Од 2021 година наваму, бројот на случаи со повеќе животни на едно место пораснал за дури 70 проценти, што покажува дека проблемот станува сѐ почест. Само минатата година биле регистрирани над 4.200 вакви случаи.

Многу од кучињата по спасувањето биле во лоша состојба, исплашени и неподготвени за контакт со надворешниот свет. Некои од нив морале да бидат носени до тревата, бидејќи никогаш претходно не биле надвор.

И покрај тоа, приказните за нивното закрепнување се охрабрувачки. Дел од животните веќе пронашле нови домови, каде што постепено се опоравуваат и учат да живеат нормално. Други сѐ уште чекаат вдомување, меѓу нив и слепото и глуво куче Стиви, кое има потреба од посебна грижа.

Во меѓувреме, неколку кучиња добиле шанса за сосема нов почеток – тие се вклучени во обука и можеби ќе станат дел од специјални служби за откривање нелегални супстанции.

Овој случај е силен потсетник дека зад неверојатните и шокантни сцени често стои сурова вистина, но и дека со грижа и посветеност, дури и најзапоставените животни можат да добијат нова шанса за живот.