Министерот за надворешни работи и надворешна трговија Тимчо Муцунски заедно со неговиот белгиски колега Максим Прево утрово трчаа низ Скопје. Македонскиот министер објави на Фејсбук дека трчањето е одлична можност за гостинот да го запознае нашиот главен град.

„Утрово, заедно со мојот колега и пријател, белгискиот министер за надворешни работи, Максим Прево, започнавме со поинаков почеток на денот – утринско трчање од 6 км низ Скопје. Шест километри низ градот беа одлична можност, во неформална и спортска атмосфера, да споделиме дел од енергијата на Скопје и да ѝ ги приближиме на белгиската делегација препознатливите обележја на нашиот главен град“ напиша Муцунски на Фејсбук и сподели фотографии.

Муцунски вчера го пречека Прево во Министерството за надворешни работи, а по тет-а-тет средбата тие имаа заедничка прес-конференција, на која македонскиот министер нагласи дека во однос на евроинтеграцијата на Македонија, клучна е подготвеноста на Европската унија за внатрешни реформи за прием на нови членки.

Муцунски вели дека ние ќе ги исполнуваме критериумите за ЕУ, но и Брисел треба да го реформира приемот на нови членки – Слободен печат

„Особено ја цениме јасната позиција дека евроинтеграцискиот процес мора да се темели на исполнување на копенхашките критериуми од страна на земјите кандидати, но клучна е и подготвеноста на самата Европска унија да спроведе неопходно внатрешни реформи за прием на нови членки – рече Муцунски.