Mинистерот за надворешни работи на Белгија Максим Прево денес и утре е во официјална посета на Македонија. Тој беше пречекан од неговиот домаќин, шефот на македонската дипломатија Тимчо Муцунски.

Во рамки на својата прва посета на земјава, министерот Прево ќе оствари тет-а-тет средба со министерот Муцунски, по што е предвидена и пленарна средба на двете официјални делегации, проследена со заедничка изјава за медиумите.

Како што соопштија од македонското МНР, централни теми на разговорите ќе бидат унапредувањето на билатералните политички и економски односи со Белгија, како и перспективите на процесот на проширување на Европската Унија, вклучително и натамошната белгиска поддршка за европската интеграција на Македонија.