Темата „Модата и филмот“ (француски: La mode au cinéma) на годинешната завршна презентација на студентите на Интернационалниот институт за мода „Изет Цури“ во Скопје се фокусира на релацијата помеѓу модата и филмот. Студентите добија задача да дизајнираат и изведат по еден изглед инспириран од одреден филм по нивен избор. Дел од решенијата се движат во рамките на костимографијата, други на модниот превод, со помалку или повеќе видлива референца на филмското остварување.

Да го одбележи крајот на учебната 2023-2024 година, Институтот на 25 јуни организираше финален испит пред комисија од модни дизајнери, личности од јавниот живот и новинари.

На 26 јуни следува ревија во Киното Милениум, а на 27 јуни, изложба во Кинотеката на Северна Македонија. Две најдобри студентки, во категориите моден дизајн и техничка изведба, добија награди – еднонеделен престој во Париз, светската престолнина на модата.