ФОТО | Милош Биковиќ и колегите уживаа на Свети Наум: Mалку е еден ден за прошетки низ Охрид
Со претставата „Лагата“ и гости од Белградскиот драмски театар, во режија на Никола Љуца, а по текст на Флоријан Зелер, во неделата на Антички театар се затвори 63-тото Охридско лето.
Главните актери на претставата, Јелисавета Теодосиќ, Тамара Крцуновиќ, Миодраг Радоњиќ и актерската ѕвезда Милош Биковиќ, се воодушевени од убавините на Охрид.
По прес-конференцијата која се одржа на Долни Сарај, Биковиќ на организаторите на „Охридско лето“ им рекол дека е воодушевен од Охрид и дека би сакал да остане неколку денови.
Актерската четворка прошета до Свети Наум на ручек, се возеше по изворите на Црн Дрим, а на своите инстаграм-профили објавија фотографии како уживаат капејќи се во езерото.
Биковиќ на пресот пред претставата изјави дека е пријатно изненаден од градот, убавините, но и од големината на фестивалот „Охридско лето“.
– Многу ми се допаѓа Охрид и езерото, но и тоа како вие го одржувате нивото на овој фестивал. Што се однесува до самата претстава, имате впечаток дека репликите се многу природни како да сте влегле во нечија спална соба и слушате разговор – изјави Биковиќ.
Ова е точниот опис на претставата што го насмеа преполниот Антички, но и сите нѐ замисли: „Дали животот во лага навистина некогаш може да биде полесен и дали со прикривањето на вистината избегнуваме да ги заштитите блиските, но и себеси?“
Маестралните актери Милош и Тамара како една брачна двојка, и Миќко (Миодраг) и Јелисавета како друга, ги носат своите вистински имиња во претставата. Миќко и Милош навистина се кумови, а нивните жени покрај нив станале пријателки. Но, драмата се случува кога вистината излегува на површина и се дознава колку си се верни едни на други, не само како партнери во бракот, туку и како пријатели. Биковиќ од навидум жртва, излегува ист како неговата жена и пријателите. Некој што изневерува во бракот, но човек што на крајот, сепак, избира да живее во лага, затоа што според неговата теорија, лагата е доказ за искрена љубов.
– Во текот на создавањето на оваа претстава, имавме еден многу интересен процес. Режисерот Љуца цело време нѐ враќаше на основните актерски задачи. Во текот на целиот процес соработувавме со него, но и меѓу себе како актери – рече на пресот актерката Јелисавета Теодосиќ.
– Она што јас го извлеков од оваа претстава е дека човек за да лаже успешно, мора да ја интегрира таа лага во својот живот, да ја памети и да поверува во неа. Потоа таа станува на некој начин вистина која истиснува некоја друга вистина во неговиот живот. Накратко, човек жртвува некаква вистина заради една лага – рече Миодраг Радоњиќ, телевизиски, филмски и театарски актер и продуцент. И во претставата, тој глуми лик од својата фела.
– Секојпат го менуваме амбиентот што секако не е лесно за овој вид претстава која е работена амбиентално – изјави актерката Тамара Крцуновиќ. Директорот на Драмскиот театар во Белград Југ Радивојевиќ рече дека за оваа претстава досега не останала ниту една карта непродадена.
„Охридско лето“ траеше речиси 40 дена, и понуди многу богата и разновидна програма. Како што на затворањето кажа директорката Наташа Поповиќ, таа е многу горда на својот тим и чест ѝ е што е дел од нив. Музички селектор беше Бисера Чадловска, а драмски Сања Арсовска.