Maкедонската кошаркарска репрезентација потешко од очекуваното успеа да слави на гости кај Азербејџан со 79-70.

Азербејџанците во Скопје ги прегазивме убедливо со 87-49, меѓутоа денеска ситуацијата на теренот беше поинаква. На почетокот од дуелот како тие да влегоа повеќе мотивирани и со поголема желба да ја израдуваат домашната публика. Првата четвртина ја добија со 28-19, а продолжија со подобрата игра и во втората.

Така стигнаа и до највисоки 18 поени предност (43-25). Избраниците на Баркола, сепак се разбудија во самиот финиш и набрзина намалија на 44-37, резултат со кој се замина на паузата.

По враќањето на паркетот од одморот ја одржуваше предноста за конечно да стигнеме до израмнување 56-56. Од тој момент стануваше јасно дека нема да дозволиме изненадување и полека го приведовме натпреварот кон крајот.

Во последната четвртина комплетно го скршивме отпорот на домашната селекција која немаше сили да се врати и да ја повтори играта од почетните минути. Андреј Јакимовски со 22 поени беше најдобар поединец во таборот на нашиот тим, додека Стојан Ѓуровски уфрли 10 поени. Кај поразените недоволни беа 23 поени на Весли ван Бек.

За Македонија ова беше четврта победа од исто толку натпревари во прет-квалификациите со што дојдовме на чекор до пласман во главните квалификации.