Украинската безбедносна служба (СБУ) денес објави дека го третира како воено злосторство нападот на Русија со балистичка ракета „орешник“ во регионот Лвов во западна Украина во текот на ноќта, пренесува Киев пост.

Во своето соопштение, СБУ соопшти дека Русија се обидела да уништи критична инфраструктура во близина на границата на Украина со Европската Унија, поради нагло влошување на временските услови. Исто така, објави фотографии од остатоците од ракетата.

Русија соопшти дека ја испалила оваа хиперсонична балистичка ракета врз својот сосед по втор пат од почетокот на инвазијата на Украина пред четири години, но не ја прецизираше својата цел.

СБУ во соопштението наведува дека ги лоцирала остатоците во регионот Лвов, кој се граничи со Полска, членка на ЕУ и НАТО. Меѓу пронајдените фрагменти се наоѓаат компонентите за стабилизација и насочување на ракетата, како и делови од моторот, соопшти СБУ.

Ова е прва официјална потврда дека регионот Лвов бил погоден од оваа ракета со повеќе боеви глави, способна да носи нуклеарни боеви глави – иако не била вооружена со нив.

„Целејќи ја цивилната инфраструктура во нашата земја, во близина на границата со Европската Унија, Кремљ се обиде да уништи витални системи во регионот“, додаде СБУ во своето соопштение.

Сепак, тие не ги прецизираа целите ниту обемот на штетата.

Украинскиот претседател Володимир Зеленски и руското Министерство за одбрана претходно објавија дека е лансирана ракета „орешник“, без да ја прецизираат целната област.

Властите во Лвов, од своја страна, едноставно пријавија напад со балистичка ракета.

Градоначалникот на Лвов, Андриј Садови, претходно денес изјави дека балистичка ракета со брзина од 13.000 км/ч била испалена кон регионот, без експлицитно да ја идентификува како „орешник“. Руските воени блогери тврдат дека цел на нападот бил голем објект за складирање на природен гас лоциран во регионот Лвов.

Сандови рече само дека е погодена „критичната инфраструктура“, но дека нападот не предизвикал жртви.

Лидерите на Велика Британија, Франција и Германија го опишаа нападот на Русија со употреба на балистичката ракета со среден дострел „орешник“ во западна Украина како „ескалација и неприфатлив“, според содржината на телефонскиот разговор што британскиот премиер Кир Стармер го имал со германскиот канцелар Фридрих Мерц и францускиот претседател Емануел Макрон, кој беше објавен од кабинетот на британскиот премиер.

ВИДЕО | Украина: Најмалку четворица мртви во руските напади во Киев