Ако ги прашате љубителите на фудбалот што знаат за оваа држава, веројатно ќе ви кажат дека во неделата го постигна својот прв гол на Мундијалот и дека шест, а потоа и 17 минути успеваше да задржи нерешен резултат против моќната германска репрезентација.

Курасао ја носи титулата на најмалата држава што некогаш се пласирала на Светско првенство во фудбал. Овој карипски остров нуди многу повеќе од спортски успеси. Станува збор за единствена дестинација што ги спојува егзотичните плажи, европската архитектура и богатото мултикултурно наследство.

Сместен во јужниот дел на Карипското Море, недалеку од брегот на Венецуела, Курасао е автономна држава во рамките на Кралството Холандија. Зафаќа површина од само 444 квадратни километри и има нешто повеќе од 150.000 жители.

Островот е познат по својата исклучителна културна разновидност. На Курасао се преплетуваат карипските ритми, холандското колонијално наследство и силните афро-карипски влијанија. Повеќето жители зборуваат дури четири јазици – папијаменто, локален креолски јазик, холандски, англиски и шпански.

Центарот на животот на островот е главниот град Вилемстад, кој се наоѓа на листата на светско наследство на УНЕСКО. Градот е препознатлив по своите шарени колонијални згради што потсетуваат на холандските градови, но сместени во живописна тропска средина.

Плажите – главниот адут на островот

Посетителите најчесто повторно се враќаат на Курасао токму поради неговите плажи. За разлика од многу карипски дестинации со долги песочни брегови, тука плажите се сместени во помали тиркизни заливи, опкружени со карпи и стрмни брегови.

Најпозната меѓу нив е плажата Гроте Книп, која воодушевува со кристално чистото море и белиот песок и се смета за една од најубавите плажи на Карибите.

Љубителите на природата особено ја ценат плажата Пискадо, позната по можноста за пливање со диви морски желки кои редовно навлегуваат во нејзините води.

Татковина на прочуениот син ликер

Посетата на Курасао е тешко да се замисли без дегустација на познатиот ликер „Блу Курасао“. Овој пијалак се произведува од кората на автохтониот горчлив портокал лараха, кој расте исклучиво на островот.

Сепак, гастрономската понуда далеку го надминува овој познат ликер и претставува спој на карипски, латиноамерикански и европски кулинарски влијанија.

Уличната уметност како туристичка атракција

Во последните години Курасао стана една од најинтересните дестинации за љубителите на современата уметност. Некогаш запуштената населба Шарло во Вилемстад доживеа целосна преобразба благодарение на проектите за улична уметност.

Локални и меѓународни уметници ги осликаа фасадите на старите колонијални згради со големи мурали што пренесуваат силни општествени и културни пораки. Денес Шарло е едно од најпосетуваните места на островот.

„Чичи“ – симбол на силата и гордоста

Меѓу најпрепознатливите сувенири од Курасао се фигурините познати под името „Чичи“. Станува збор за скулптури на афро-карипски жени со заоблени форми, украсени со шарени мотиви.

Тие ја симболизираат силата, стабилноста и важната улога на постарата сестра во семејството и станаа еден од заштитните знаци на островската култура и идентитет.

Спојот на европската традиција, карипскиот начин на живот, импресивната природа и богатата културна сцена го прават Курасао еден од најинтересните, но сè уште недоволно откриени бисери на Карибите.