ФОТО | Игор Џамбазов и Гуру Харе најавуваат премиера на видеоспот за песната „Пеј“
По промоцијата на нивниот албум „Првите триесет“ и многу концерти низ државата, Игор Џамбазов и Игор Атнасовски – Харе, подготвуваат нови изненадувања за публиката.
Изминатиов период тие снимаа видеоспот за песната „Пеј“ од албумот „Првите триесет“, а според фотографиите направени на снимањето можеме да очекуваме уште едно ремек дело. Игор и Харе за првпат соработуваа со еден од најдобрите концертни фотографи кај нас, Стефан Рајхл и како што изјавија за „Слободен печат“ соработката ветува спот кој на поинаков начин ќе раскаже уште една моќна приказна на дуото.
Наскоро е најавена премиерата на спотот во режија на познатиот фотограф Рајхл, кој со ова зачекорува во водите на видео продукцијата. Сниман е на многу необична локација и гледачите ќе видат нешто што најмалку очекуваат од Игор и Харе.
Следниот чекор на познатото музичко дуо е големиот концерт на 21 октомври во Македонската филхармонија каде концертно ќе го промовираат материјалот од албумот „Првите триесет“ и ќе ги изведат некои од најголемите хитови. Со овој концерт тие ќе ја одбележат нивната 30-годишна соработка, а Џамбазов ќе го прослави својот 60-ти роденден.
Влезниците за концертот можат да се купат преку продажната мрежа на https://mktickets.mk/event/igor-i-guru-hare/
Новиот спот за „Пеј“ ќе биде објавен на јутјуб каналот Guru Hare – YouTube.