ФОТО+ВИДЕО: Црвен картон од студентите до Министерството за образование
И покрај тоа што утрово на сметката на студентите легнаа средства од стипендии, средства од финансиската поддршка за меѓуградски превоз за јануари, како и средства за оние кои зедоа пониски стипендии, а не беа исплатени во декември, студентите не се откажаа од одржување на протестот.
Револтирани од ненавремената исплата на студентските стипендии, задоцнета исплата на ваучери за превоз, како и проблемите со мерката субвенциониран студентски оброк, студентите денеска одржаа протест пред Министерството за образование и наука.
Со црвени картони и транспаренти тие пред зградата на Министерството го изразија незадоволството од неправдата што им беше нанесена и порачаа дека сакаат промени и одговорност.
Претседателот од Универзитетското студентско собрание (УСС) на Универзитетот „Св. Кирил и Методиј“-Скопје, Александар Николовски порача дека студентите бараат промени и фокусот во државата да биде насочен кон младите.
– Пораката е дека студентите се тука и фокусот треба да биде кон нив. УСС заедно со останатите универзитетски собранија ќе се залага за системски решенија за студентите – додаде Николовски.
Тој соопшти дека во моментов не се планира друг протест.
Организатор на протестот е Универзитетското студентско собрание (УСС) на Универзитетот „Св. Кирил и Методиј“-Скопје, со поддршка на студенти од уште неколку други универзитети во земјава, а на протестот им се придружи и неформалната организација „Студентски отпор“.
И покрај тоа што утрово на сметката на студентите легнаа средства од стипендии, средства од финансиската поддршка за меѓуградски превоз за јануари, како и средства за оние кои зедоа пониски стипендии, а не беа исплатени во декември, студентите не се откажаа од одржување на протестот.
Од УСС порачаа дека протестот се одржува за „сите неправди што досега беа извршени врз студентите“.
Неколку часа пред да започне протестот, министерот Јетон Шаќири соопшти дека средствата за стипендија се исплатени до сите студенти кои ги исполнуваат условите.
Во пресрет на најавениот студентски протест, Шаќири апелираше до студентите да не дозволат да бидат манипулирани од дезинформации и злонамерни повици и својата енергија да ја насочат кон подобри резултати на испитите во февруарската сесија.
Ве повикувам да ја искористите концентрацијата и енергијата за поголем успех на испитите кои ги имате оваа недела, апелирам да не дозволите да бидете манипулирани од дезинформации и злонамерни повици. Со среќа, напиша Шаќири на својот фејсбук-профил.