На Охрид никогаш не му недостасувале авантуристи – и меѓу домаќините и меѓу гостите, а за тоа е доказ денешната сцена забележана во градот. Еден одважен мераклија се слече и заплови на својата даска, уживајќи во секој сончев миг и пркосејќи им на врвовите на Галичица, сè уште покриени со дебел снег.

Според Управата за хидрометеоролошки работи, денеска во Охрид е измерена една од највисоките температури во државата денес, но тоа се сепак само 18 степени (минималната претходната ноќ била само 7 степени), па охриѓани, кои тоа најдобро го знаат, ќе ви кажат дека пред Велигден во секој случај е прерано за капење во езерото и за водени спортови.

Охрид утрешниот празник го дочекува преполн со посетители, а повеќето сместувачки капацитети во поширокиот центар на градот се исполнети.