„Се очекува дека активностите ќе ги вклучуваат преглед на документација и други мерки кои ќе помогнат да се утврди евентуалната одговорност на лицата поврзани со овие наводи. Јавноста ќе биде навремено информирана за резултатите од постапката“, се вели во соопштението.

Полицијата, по барање на Финансовата полиција, уапсила дел од поранешното раководство на ЈЗУ општа болница „Борка Талески”, а неофицијално вкупно 25 луѓе се осомничени, а шестмина, меѓу кои и поранешната директорка на болницата, се во полициска станица.

Според извори од ОЈО Прилеп кои ги пренесуваат медиумите, првичните информации се дека предметот се однесува на финансиски малверзации, фиктивни набавки и злоупотреби со јавни пари, а истрагата се проширува и кон други институции кои имале договори со болницата.

Полицијата ги претресла домовите на неколкумина од осомничените, а еден од нив поради влошена здравствена состојба е пренесен во болница.