Министерот за здравство, Венко Филипче, денеска потврди дека е регистриран четврт случај на коронавирус во Македонија. Станува збор за, замислете, лекарка, директорка на Клиниката за кожни болести. Оваа, во јавноста доста позната и реномирана лекарка, била во Италија, се вратила, и не се пријавила, не се ставила во самоизолација и дури пет дена одела на работа. Но, утешително е дека немала директен контакт со пациенти?! А во канцеларија пет дена никој не и влегол? Пет дена не одела во продавница, во ресторани, не комуницирала со никого?!

Замислете само колку луѓе довела во опасност оваа докторка. Каде е лекарската етика тука? Каде е лекарската одговорност? Па нели докторке, пациентите пред се?

Како е можно доктор да си дозволи да биде толку себичен и да ризикува уште стотици други луѓе околу себе да се разболат од коронавирус? Како воопшто било кој може да си дозволи да биде толку себичен? Дури и во ваков случај, мораше да се потврди македонската девиза „да му умре козата на комшијата“.

И секогаш си страдаме самите од себе, од нашите непромислени постапки, од нашата себичност и преголема сигурност во себе. Министре, рековте дека сте разочаран. И треба да бидете, издадовте препораки за почитување, но кој да ви ги почитува? Треба да имате совесен народ за да ги почитува овие ваши препораки.

А што да каже народот? Каква доверба  треба да имаат луѓето во здравствениот систем кога секогаш некој од вас го руши лекарскиот углед. И треба да веруваме дека лекарите се грижат за нашето здравје? Не би рекла.