Тимови од здравствени лица ќе одат од врата до врата и ќе ги посетуваат семејствата каде има невакцинирани лица. Оваа активност, Министерството за здравство ја организира во рамки на одбележувањето на Европската недела на имунизација 2023, заедно со Светска здравствена организација, со финансиска поддршка од Европската Унија.

Како што соопштија, со кампањата ќе бидат опфатени 20 општини – 120 населени места, рурални и урбани, каде е регистриран понизок опфат на вакцинирани деца согласно календарот за задолжителна имунизација, како и вакцинација против Ковид-19.

Тимовите ги информираат семејствата за придобивките од имунизацијата, делат промотивен материјал и во договор со родителите имаат можност да закажуваат термини за вакцини од редовниот календар за имунизација, се вели во соопшението.

Предвидено е кампањата да трае пет недели, односно до крај на месец мај и планирано е да се посетат над 2 900 семејства.

Во рамки на кампањата, постарите лица над 60 години имаат можност на лице место да примат поливалентна вакцина против Ковид-19 како бустер доза.