Преговорите за прекин на руската агресивна војна во Украина се во полн ек, но американскиот план од 28 точки предизвика загриженост во Европа. Како резултат на тоа, европските партнери одговорија со детален контрапредлог кој значително омекнува голем број клучни точки во корист на Украина, пишува германски „Велт“, додавајќи дека „Ројтерс“ го видел целиот документ. Треба да се напомене дека претходно беше протечен и посебен европски план од 24 точки за Украина.

Според европскиот предлог, Киев повеќе нема да биде должен да ѝ ги предаде на Русија териториите што сè уште ги контролира, а нема и фактичко признавање на териториите што ги окупира Русија. Понатаму, се предлага да се ограничи големината на украинските вооружени сили на 800.000 војници, наместо 600.000 како што е наведено во американскиот план. Една од клучните промени се однесува и на замрзнатите руски државни средства, кои би биле одмрзнати дури откако Русија ќе плати надомест за воена штета.

Особено е значајно што третата точка од американскиот план е целосно избришана. Во него се наведува:

„Од Русија се очекува да не ги напаѓа своите соседни земји и дека НАТО нема дополнително да се шири“. Европската верзија, исто така, не го исклучува експлицитно идното пристапување на Украина во НАТО, ниту одобрува општа амнестија за воени злосторства. Рокот за одржување избори во Украина, кој беше поставен на 100 дена во американскиот план, повеќе не се споменува; наместо тоа, се наведува дека тие треба да се организираат „што е можно поскоро“ – наведува медиумот.

Во моментов не е познато до кој степен овие предложени промени се прифатени во преговорите меѓу САД и Украина во Женева. Сепак, според американската влада, постигнат е „огромен напредок“ и Украина сега е задоволна од планот.

27-те точки на ЕУ за завршување на војната во Украина:

1. Потврден е суверенитетот на Украина.

2. Склучен е сеопфатен и целосен пакт за ненапаѓање меѓу Русија, Украина и НАТО. Сите двосмислености од последните 30 години ќе бидат отстранети.

3. (Избришано: 3. Од Русија се очекува да не ги напаѓа своите соседи и НАТО нема да се шири понатаму.)

4. По потпишувањето на мировниот договор, ќе се одржи дијалог меѓу Русија и НАТО за да се решат сите безбедносни проблеми и да се создаде средина за деескалација што ќе обезбеди глобална безбедност и ќе ги подобри можностите за вмрежување и идните економски можности.

5. Украина ќе добие солидни безбедносни гаранции.

6. Големината на украинската армија во мирно време треба да биде ограничена на 800.000.

7. Пристапувањето на Украина во НАТО зависи од консензус меѓу членките на НАТО, кој, сепак, не постои.

8. НАТО ја изјавува својата подготвеност трајно да не стационира трупи под нејзина команда во Украина во мирновременски услови.

9. Борбени авиони на НАТО ќе бидат стационирани во Полска.

10. Украина добива силни правно обврзувачки безбедносни гаранции, вклучително и од Соединетите Американски Држави (договор сличен на Член 5), за да се спречи идна агресија.

11. Украина ги исполнува условите за членство во ЕУ и, во текот на периодот на разгледување, добива краткорочен преференцијален пристап до европскиот пазар.

12. Силен пакет за глобално закрепнување за Украина.

13. Русија треба постепено да се реинтегрира во светската економија.

14. Украина ќе биде целосно обновена и финансиски компензирана, вклучително и преку рускиот државен имот кој ќе остане замрзнат додека Русија не ја компензира Украина.

15. Ќе се формира заедничка работна група за безбедност со учество на САД, Украина, Русија и Европејците за промовирање и спроведување на сите одредби од овој договор.

16. Русија законски ќе ја зацврсти политиката на ненапаѓање кон Европа и Украина.

17. Соединетите Американски Држави и Русија се согласуваат да го продолжат договорот за неширење и контрола на нуклеарното оружје, вклучувајќи го и „СТАРТ“.

18. Украина ја изјавува својата подготвеност да остане држава без нуклеарно оружје во согласност со Договорот за неширење на нуклеарно оружје.

19. Нуклеарната централа Запорожја ќе биде рестартирана под надзор на МААЕ, а произведената електрична енергија ќе биде поделена подеднакво (50:50) меѓу Русија и Украина.

20. Украина ги усвојува регулативите на ЕУ за верска толеранција и заштита на јазичните малцинства.

21. Територии: Украина се обврзува да не ги враќа своите окупирани територии со воени средства а преговорите за размена на територии започнуваат на контактната линија.

22. Откако ќе се постигнат идните територијални договори, и Руската Федерација и Украина се обврзуваат да не ги менуваат тие договори со сила. Во случај на прекршување на оваа обврска, сите безбедносни гаранции престануваат да важат.

23. Русија не смее да се меша во користењето на Днепар од страна на Украина за комерцијални цели, а ќе се постигнат договори за да се овозможи непречен транспорт на жито преку Црното Море.

24. Ќе се формира хуманитарен комитет за решавање на отворените прашања.

25. Украина ќе одржи избори што е можно поскоро по потпишувањето на мировниот договор.

26. Ќе се преземат мерки за ублажување на страдањата на жртвите од конфликтот.

27. Овој договор е правно обврзувачки. Неговото спроведување ќе го надгледува и гарантира Советот за мир со кој претседава претседателот Доналд Трамп. Во случај на прекршување, ќе се изречат казни.

28. По согласност на сите страни во овој меморандум, прекинот на огнот ќе стапи во сила штом
двете страни ќе се повлечат на договорените точки за да започнат со спроведување на
договорот. Модалитетите на прекинот на огнот, вклучително и мониторингот, ќе бидат
договорени меѓу двете страни под надзор на САД.