Паневропскиот филмски фонд „Еуримаж“ на 170-та сесија, која беше последна за оваа година, го поддржа филмскиот проект „Скејтбордингот не е за девојчиња“ на режисерката Дина Дума со износ од 350.000 евра.

Станува збор за копродукција помеѓу македонскиот продуцент „Сестри и брат Митевски“, „Ентре Чиен Луп Сцрл“ од Белгија и „Вертиго / Терминал 3“ од Словенија, објаснува Тања Ќурчинска Пепељугоска, национален претставник во „Еуримаж“.

Во ноемвриската сесија од вкупно оценувани 99 проекти, само 29 добија финансиска поддршка од „Еуримаж“.

– Во ваква конкуренција проектот „Скејтбордингот не е за девојчиња“ беше оценет одлично и рангиран на високо 3-то место на листата во својата група. Коментарите за проектот беа позитивни и оптимистички: „…млада и талентирана режисерка која треба да се поддржи; сценариото е интересно, внесува модерни елементи во една конзервативна заедница на Ромите на Балканот; сериозен продуцентски тим…“ – истакнува Ќурчинска Пепељугоска.

Северна Македонија е членка на „Еуримаж“ од 2003 и оваа јубилејна година ја завршува со поддршка од вкупно 775.000 евра доделени на проектите „Ди Џеј Ахмет“ на Георги Унковски на 168-та сесија, „Човек против јато“ на Тамара Котевска на 169-та сесија и „Скејтбордингот не е за девојчиња“ на Дина Дума на 170-та сесија.

– Очекувам дека за 2-2,5 години ќе имаме можност да ги видиме овие филмови на големото платно, особено поради фактот што странските копродуцентски партнери се обезбедени, а со тоа и финансирањето од нивните национални фондови. Се надевам дека и нашата Агенција за филм ќе стори напор да не се повтори оваа година, во која првите 10 месеци немавме ниту еден снимачки ден и дека нашата продукција ќе биде многу поинтензивна следната година – додава Ќурчинска Пепељугоска.

Европскиот фонд за копродукција и дистрибуција на креативни кинематографски и аудиовизуелни дела – „Еуримаж“ од своето основање во 1989 година до денес поддржал 2.438 копродукциски проекти со вкупен буџет од околу 710 милиони евра.