Европската унија (ЕУ) го усвои 19-тиот пакет санкции против Русија, дополнително насочени кон руската трговија со нафта, потврди утрово високата претставничка на ЕУ за надворешна политика и безбедност, Каја Калас, со оценка дека „на рускиот претседател Владимир Путин му е сè потешко да ја финансира војната“, пренесуваат медиумите.

Претседателот на Украина, Володимир Зеленски, ја поздрави одлуката на ЕУ, како и одлуката на САД за санкции против Русија објавена синоќа, како „многу важен чекор“.

Најновите санкции на ЕУ се насочени кон руските банки, крипто берзите и субјектите во Индија и Кина.

„ЕУ го ограничува движењето на руските дипломати за да се спротивстави на обидите за дестабилизација“, рече Калас.

„На Путин му е сè потешко да ја финансира војната“, додаде таа.

Санкциите на САД и ЕУ против Русија претставуваат „многу важен“ чекор, изјави Володимир Зеленски денес по пристигнувањето на европскиот самит во Брисел.

„Го чекавме ова, се надеваме дека ќе успее, многу е важно“, истакна Зеленски.

Одлуката за нов пакет европски санкции доаѓа еден ден откако администрацијата на американскиот претседател Доналд Трамп објави дека воведува нови санкции против руската нафтена индустрија.