Мегазатвор со капацитет да прими 40.000 затвореници, е отворен во Ел Салвадор, за да ги растовари преполнетите казнено-поправни домови во земјата по обемната кампања на властите против криминалот во земјата.

Дури и ако ја избегне „судбината“ да прими повеќе луѓе од капацитетот, затворот во Теколука би бил најголем во Латинска Америка, а веројатно и во светот. Во Ел Салвадор има само 14 града со повеќе од 40.000 жители. За споредба, гратчето Теколкука покрај кое е изграден има 2.781 жител, а целиот регион има 30.000 жители.

Ќелиите на Притворниот центар за тероризам, како што е името на затворот, веројатно брзо ќе бидат пополнети. Конгресот лани во март објави вонредна состојба поради порастот на криминалот, па полицијата и армијата добија проширени овластувања да прислушуваат осомничени лица и да апсат без налог. Во координираната офанзива беа приведени повеќе од 62.000 осомничени членови на банди и нивни соработници.

Тоа придонесе во земјата со околу 6,6 милиони жители да има повеќе од 120.000 приведени или затворени лица, што е 2 отсто од популацијата. Во „Ла Есперанца“, до завчера најголемиот затвор во Ел Салвадор, има 33.000 затвореници, што е тројно повеќе од максималниот капацитет. Пред офанзивата против бандите, во 20 казнени установи низ Ел Салвадор веќе имало 36.000 лица.

– Сите тие момци, тие терористи во организациите од кои страда нашиот салвадорски народ, ќе бидат во дом под строг надзор и режим – изјави директорот на националните затвори Осирис Луна.

Новиот затвор ќе се простира на површина од 166 хектари, а ќе го обезбедуваат 600 војници и 250 полицајци. Електронски систем ќе го блокира пристапот до мобилната и сателитската мрежа.

Претседателот Најиб Букеле изјави дека новиот центар КЕКОТ е „основа за победата во војната против бандите“.

– Во новиот комплекс затворениците повеќе нема да имаат пристап до проститутки, мобилни телефони, компјутери или конзоли за играње, како низ другите затвори – изјави претседателот при обиколка на празниот затвор. Тој не најави кога таму ќе бидат префрлени првите затвореници.