Еден од патниците на „Дајмонд принцес“ кој пристигна во Израел има коронавирус
Еден од патниците кој во Израел пристигна од крузерот „Дајмонд принцес“ има коронавирус, соопштија денес израелските власти. Ова е прв случај на вирусот во Израел.
Медицинскиот центар Шеба наведе дека заболениот човек се лекува и е во карантин.
Единаесет од 15 Израелци кои беа во карантин на бродот за туристички крстарења кој е всидрен во Јапонија, денес со приватен авион стигнаа во Израел и веднаш се спроведени во карантин во Медицинскиот центар Шеба кај Тел Авив.
Ќе им биде дозволено да излезат ако останат здрави во период од 14 дена, колкушто е потребно за инкубација на новиот коронавирус.
Четири Израелци за кои е потврдено дека се заразени се лекуваат во Јапонија.
Светската здравствена организација наведе дека повеќе од половина од случаите надвор од Кина се на бродот „Дајмонд принцес“, пренесоа израелските медиуми.