Џез-фестивалот „Нишвил“ со концерт ќе се презентира во Скопје
Во Амбасадата на Република Србија во Република Северна Македонија се одржа прес-конференција на која беше најавен концертот „Нишвил во Скопје“, кој ќе се одржи на 19 јули, во 20.30 часот, во Куршумли-ан во Скопје. Концертот е дел од програмата на „Скопско лето“, а се реализира во соработка со здружението „Полифонија“.
На конференцијата се обратија амбасадорката на Република Србија во Република Северна Македонија, Н.Е. Невена Јовановиќ, директорот на џез-фестивалот „Нишвил“, Иван Благојевиќ, пијанистот на групата „Моба трио“ Миша Павловиќ и вокалната солистка на „Нишвил Ромаџем оркестар“ Злата Маринковиќ.
– Горди сме и среќни што и со концертот на препознатливиот културен бренд, џез-фестивалот „Нишвил“, ги потврдуваме добрите билатерални односи што ги имаат нашите две држави и што низ уметноста, која не поврзува и спојува, ќе имаме можност преку реномирани уметници од Република Србија и со присуство на претставници на џез-фестивалот „Нишвил“ уште еднаш да покажеме колку нашите култури, традиции и народи се блиски. И во оваа прилика ќе нагласам дека Република Србија во целост е посветена со Република Северна Македонија да гради исклучително пријателски односи, кои се базирани на меѓусебна доверба и соработка – рече амбасадорката Невена Јовановиќ.
Меѓународниот џез-фестивал „Нишвил“ од Србија на „Скопско лето“ ќе се претстави со концерт на кој ќе учествуваат групата „Моба трио“, „Нишвил Ромаџем оркестар“ и диџеј Лоптица. На конференцијата беше презентирана и програмата на годинашното издание на џез-фестивалот „Нишвил“, што се одржува во Тврдина во Ниш, Србија.
– Се надевам дека средбите од овој вид ќе станат традиција и секоја година ќе бидеме гости на српската амбасада и на градот Скопје – рече Иван Благојевиќ, директорот на џез-фестивалот „Нишвил“, кој објасни дека посетителите од Македонија се меѓу најбројните на фестивалот во Ниш.
Активностите поврзани со фестивалот „Нишвил“ ќе се одржат од 4 до 13 август во Тврдината во Ниш. Програмата на фестивалот ќе се одвива на 16 сцени со 280 настани и со учество на околу 900 изведувачи.
Интернационалниот џез-фестивал „Нишвил“ ќе се одржи од 10 до 13 август и на сцената во Ниш ќе ги донесе групите „Дубиоза колектив“ (БиХ), Роберто Фонсека (Куба), Теодосиј Спасов (Бугарија), Ида Нилсен (Данска), „Ејжн даб фондејшн“ (Обединето Кралство), „Еурокубанс“ (Куба / Словенија), Трики (Обединето Кралство), Тана Алекса со Антонио Санчез (САД), но и други имиња кои ќе настапат на некоја од многубројните сцени.
Легендарниот српски пијанист Миша Павловиќ, кој во Скопје ќе настапи со „Моба трио“, истакна дека четирите денови на џез-фестивалот се вистински празник на музиката во Ниш, бидејќи доаѓаат групи и посетители од целиот свет.
Вокалната солистка Злата Маринковиќ од „Нишвил Ромаџем оркестар“ го истакна значењето на сегментот „Шабан и Балкан брас сцена“, на која се изведува етно и џипси-џез музика. Со таков жанр музика таа ќе настапи со нејзиниот оркестар на сцената во Куршумли-ан во Скопје.