Мечот кој ќе се емитува на „Нетфликс“ ноќва ги соочува еден од најдобрите тешкаши на сите времиња со ѕвезда од социјалните мрежи која стана боксер, објави „Ен-би-си њуз“.

Ентони Џошуа без сомнение е еден од најголемите боксери на својата генерација. Британецот има 28 победи и 4 порази, од кои 25 победи со нокаут. Тој е двократен обединет светски шампион во тешка категорија и олимписки шампион.

Џошуа вели дека парите не се единствената причина поради која решил да се бори со Џејк Пол, инфлуенсерот кој стана боксер.

„Видов што значи ова. Ова дури и не е мојата најголема исплата; не се работи за пари. За мене, станува збор за можност. Сакав да ги покажам моите вештини пред целиот свет,“ рече Џошуа за настапот.

ВИДЕО | Џејк Пол го победи Мајк Тајсон со едногласна одлука на судиите

Џејк Пол стана професионален боксер во 2020 година. Тој има 12 победи и 1 пораз, со импресивна сила и техника, иако најголем дел од победите ги оствари против остарени ММА борци (како Бен Аскрен, Тајрон Вудли, Андерсон Силва и Нејт Дијаз) или боксери далеку од своите најдобри денови (Хулио Сесар Чавез и Мајк Тајсон, кога имаше 58 години).

Џошуа е убедливо најтешкиот тест во кариерата на Пол досега, вистинска боксерска ѕвезда која не е далеку од своите најславни денови.

За пофалба е тоа што Џошуа не го потценува мечот. Тој вели дека ја напуштил Велика Британија за да избегне локални одвлекувања и дека тренира во Шпанија со тимот на светскиот шампион во тешка категорија, Олександр Усик.

На прашањето дали противник со само пет години искуство во боксот воопшто треба да биде во ринг со него, Џошуа веднаш го отфрли тоа размислување.

„Можам да седам тука и да зборувам за сите работи што Џејк не ги прави добро, но јас се борам со Џејк кој на 19 декември ќе прави сè како што треба. Затоа ќе се фокусирам на тоа. Тој е добар човек, си ја тера својата работа, има одличен тим околу себе, вложува труд — и затоа денес е тука. Секој што работи понапорно од другите заслужува да биде фаворит, а тој во моментов е фаворит во боксерската игра,“ рече тој.

Борбата ќе се емитува ноќеска на „Нетфликс“, со почеток во 2 часот по полноќ.