По трагичниот настан во кој при пад во отвор за лифт животот го загуби 28-годишниот охриѓанец Кристијан Љушев, Трудовиот инспекторат ќе поднесе кривични пријави против две компании, објави „Алфа“.

По двонеделна детална проверка, инспекторите утврдиле сериозни пропусти во примената на законските стандарди за безбедност при работа на градилиште, но поради тековната истрага не се соопштува за кои фирми станува збор.

Кристијан, кој бил вработен во фирма за уредување ентериери, настрадал додека заедно со колега пренесувал метален дел долг речиси два метра во објект во изградба.

По утврдените неправилности, инспекторите изрекле привремена забрана за изведување работи на градилиштето за сите вклучени правни субјекти – инвеститорот, изведувачот и надзорот.

Неколку дена пред несреќата, таткото на Кристијан дошол на градилиштето за да му го донесе паричникот и, како што сведочи, бил шокиран од состојбата во објектот.

Според неговите зборови, зградата била лесно достапна, без соодветни огради и заштита, а отворите за лифтови биле целосно необезбедени.

Тој истакнува дека уште тогаш го предупредил синот на опасностите и дека очекува институциите да утврдат одговорност.

— Детето не може никој да ми го врати назад, но треба да има една правда, да се знае дека некој одговарал — изјави таткото Валентин Љушев.

Трагедија во Охрид: Загина младиот фотограф Кристијан Љушев, паднал во зграда