Службата за безбедност на Украина и Националната полиција вчера привеле двајца агенти на руската Федерална служба за безбедност (ФСБ) кои планирале да разнесат една од административните згради во центарот на Киев, објави „Укринформ“.

Осомничените, идентификувани како двајца жители на Киев, биле фатени додека се обидувале да побегнат во Русија.

Според истражителите, осомничените претходно поставиле импровизирана експлозивна направа во киевскиот реон Шевченковски и планирале да ја активираат далечински.

Полицијата изјави дека едниот од сторителите е регрут кој неовластено ја напуштил својата воена единица, а другиот е маркетинг специјалист.

Двајцата осомничени биле контактирани од руските специјални служби преку „Телеграм“ канали, каде што објавувале коментари со поддршка за кремљскиот режим, велат истражителите.

Доколку ја извршеле мисијата, Русите им ветиле евакуација на агентите на руска територија и нивно последователно вработување во ФСБ.

При претресите, на приведените им биле одземени мобилни телефони со докази за нивна соработка со руските служби, како и гумен чамец наменет за нелегално преминување на државната граница.

Осомничените се во притвор и им се заканува доживотна казна затвор.

Група руски агенти уапсена во Одеса, им се заканува доживотен затвор поради шпионажа