Демократската унија за интеграција будно ја следи големата загриженост во редовите на ВМРО- ДПМНЕ и длабоките поделби што се појавуваат во битката меѓу интеграција и изолација, велат од ДУИ по кавгата помеѓу актуелниот и поранешниот лидер на ВМРО-ДПМНЕ Христијан Мицкоски и Никола Груевски.

-Оваа внатрешна битка меѓу силите во ВМРО кои се залагаат за интеграција на земјата во Европската Унија и оние кои претпочитаат изолација се одвива на грб на државата и нејзините граѓани, но и преку злоупотреба на институциите, процесите во земјата, како и политичките партии и партиските лидери – велат од партијата на Али Ахмети.

Од ДУИ велат дека интервјуто Ахмети зборувал за преговарачкиот процес во Пржино и средбите со Зоран Заев и Никола Груевски за надминување на состојбите преку процесот на вистината и помирувањето.

-На овие средби на лидерите во Клубот на пратеници, кои се одржани со знаење на меѓународната заедница и партиските раководства, беше формирана работна група во состав: Оливер Спасовски, Никола Тодоров и Артан Груби. Додека, измените во Кривичниот законик првично беа побарани од страна на ВМРО-ДПМНЕ пред уставните измени за Договорот од Преспа. Потоа, КЗ беше барање и на новиот претседател на ВМРО- ДПМНЕ, Христијан Мицкоски на лидерските и билатералните средби, но по неговото оддалечување од поранешното раководство на ВМРО- ДПМНЕ и покрај согласувањето на СДСМ, тој се повлече од ова барање – велат од ДУИ.

Според интегративците, ниту државата, ниту граѓаните, ниту медиумите, ниту Американците и Европејците, ниту СДСМ и ДУИ не се непријатели на ВМРО- ДПМНЕ, туку сите прогресивни сили во државата се залагаат ВМРО да се откаже од својата изолационистичка политика и да станe дел од Европска Македонија.