ДУИ: Ахмети утре ќе соопшти голема вест
Претседателот на Демократската унија за интеграција (ДУИ), Али Ахмети утре преку директен пренос на неговиот Фејсбук-профил ќе соопшти „голема вест“, се вели во соопштението од партијата. Информацијата ја сподели и вицепремиерот и министер за политички систем Артан Груби, но без прецизни информации за што ќе говори Ахмети.
„Ве известуваме дека утре (четврток, 22.02.2024) со почеток во 11:00 часот, Али Ахмети ќе им се обрати на граѓаните преку директен пренос на неговата страница на социјалната мрежа Фејсбук за да ја соопшти големата вест“ велат од ДУИ.
Најверојатно, во утрешното обраќање Ахмети ќе ја соопшти партиската одлука околу настапот на изборите.
Порталот МКД.мк денеска објави дека според високи партиски извори, градоначалникот на Општина Кичево, Фатмир Дехари ќе биде кандидатот на ДУИ за претседател на Македонија.
Од албанската опозициска коалиција „Вреди“, пак, на денешната прес-конференција истакнаа дека ДУИ најверојатно ќе го предложи Бујар Османи за претседателски кандидат.