Кошаркарската репрезентација на Полска го приреди најголемото изненадување од почетокот на Евробаскет 2022, откако во четвртфиналето го совлада бранителот на титулата, селекцијата на Словенија.

Тој меч ќе остане запаметен како најлошиот што го одигра Лука Дончиќ на ова ЕП, бидејќи истиот го заврши поради пет фаули, а претходно оствари учинок од 14 поени, 11 скока и седум асистенции, но имаше и шест загубени топки, како и слаб процент на шут (33 проценти од поле, 25% од линијата за слободни фрлања).

Во моментот кога заврши натпреварот, асот на Далас маверикс истрча кон судиите и не ги бираше зборовите додека им упатуваше пцовки и навреди.

Luka Dončić poludeo pic.twitter.com/GU42sUbD5R

— Zivot je sport (@asarealasa) September 14, 2022

Малку подоцна еден од најдобрите кошаркари во светот со малку поладна глава се појави пред новинарите на прес-конференција.

– Секоја чест за Полска, тие одиграа фантастичен натпревар од првата минута, ова е голем успех за нив. Што се однесува до нас, не влеговме во мечот како што сакавме, се вративме, но Полска продолжи да се бори и секоја им чест – рече Дончиќ.

Најдобриот словенечки репрезентативец чувствува дека ја разочара својата земја.

– Не ни знам, веројатно не сум 100% подготвен. Имав многу да дадам на ова првенство, го разочарав целиот тим, нацијата, но морам да се вратам и да бидам многу подобар. Играв многу лошо. Различно е во споредба со клубот, најубаво е да играш за Словенија, мислам дека сите се боревме, особено во второто полувреме. Тие порази болат, спортот е таков – вели Дончиќ.

Селекторот на Словенија, Александер Секулиќ по мечот изјави дека Дончиќ играше повреден и со болки, но сакаше да помогне.