Кошаркарите на Полска ја приредија најголемата сензација на овогодинешниот Евробаскет, совладувајќи го во четврт-финалето актуелниот шампион Словенија со резултат 90:87. Полска за првпат од 1971 година е во полуфиналето на континенталните собири. На последниот Евробаскет во 2017 година го освои дури 18 место.

Полјаците одлично го започнаа мечот и ја добија првата четвртина со 26:29, а во втората целосно доминираа и на пауза заминаа со огромни 19 поени предност (39:58).

Во третата четвртина Словенците возвратија со иста мера, постигнаа 24 поени, а Полска само шест за само минимално 63:64.

Словенија направи пресврт, имаше и пет поени предност (73:68), но следуваше камбек на избраниците на селекторот Игор Миличиќ со серија од 16:3 што се покажа како клучно за крајниот епилог.

Првото име на натпреварот беше Матеуш Понитка со 26 поени, 15 скока и 10 асистенции. Го следеа Еј Џеј Слотер и Михал Соколовски со по 16. За Словенија Влатко Чанчар постигна 21, Горан Драгич 17, а Лука Дончиќ 14 поени и 11 скока.

Во полуфиналето Полјаците ќе играат против Франција, која претходно денеска по продолженијата беше подобра од Италија.

Европско првенство 2022

Полуфинале, двојки:

16 септември

Германија – Шпанија
Полска – Франција

18 септември

Натпревар за трето место
Финале