Документарниот филм „Господата од современа“ во режија на Ана Алексовска, во продукција на „Лист“, е селектиран на овогодишното издание на „The Changing Face of Europe“, иницијатива на ЕФП (European Film Promotion) во соработка со канадскиот Интернационален фестивал на документарни филмови „Хот докс“ (Hot Docs).

– Документарецот „Господата од современа“ е дел од програмата составена од десет извонредни европски документарни филмови, кои нудат единствен и неконвенционален увид во реалноста на современиот европски живот. Филмовите ќе бидат претставени пред дистрибутерите преку учеството во „Док шоп“, „виртуелен“ маркет на „Хот докс“, кој нуди пристап до курирани листи на наслови на документарни филмови.

Авторите на 10-те избрани филмови се поканети да учествуваат и во новата програма за дигитална индустрија, а ќе добијат можност и да остварат средба со дистрибутери и селектори на филмски фестивали преку виртуелни индивидуални состаноци во организација на ЕФП, известија од Агенцијата за филм.

(Текстот е објавен во „Културен печат“ број 27, во печатеното издание на „Слободен печат“ на 17-20 април 2020)