Ем се заразени со омикрон, ем се на работа. Голем број граѓани ги игнорираат симптомите на омикрон варијантата на коронавирусот и го шират вирусот на работните места. Тие ниту се тестираат, ниту се евидентирани во листата заболени на Институтот за јавно здравје, движењето не им е контролирано, ниту пак им се знаат контактите. Ова, заедно со масовните новогодишни прослави, се причините зошто бројот на новозаразени во земјава за една недела порасна за 50 проценти и сега активни се над 10.300 случаи, вели за „Слободен печат“ д-р Ненад Лазаров, матичен лекар од Скопје.

-Во моментот имам ист или поголем број на ковид пациенти без ПЦР тест отколку такви кои имаат направено. Повеќето прават брз тест дома сами и сами си одредуваат колку и дали ќе бидат во изолација! Со закон ми е забрането и немам како да реагирам кога ги гледам по ресторани, си одат на работа, шетаат најнормално, дури и продавачи кои одат по канцеларии, посочува д-р Лазаров.

Во амбулантите матичните лекари не можат да постигнат да прегледаат пациенти кои имаат температура, кашлица, течење на носот и изнемоштеност. Најчесто им се даваат витамини и им се препорачува одмор, а се прават и крвни анализи.

Дека омикрон веќе не е спорадична варијанта, туку варијанта која доминира во земјава, освен високите бројки, покажува и анализата на Институтот за јавно здравје. Таму секвенционирани се 152 примероци на Сарс Ков 2 и од нив кај околу 70 проценти детектирана е токму оваа варијанта. Заразени со омикрон има во Скопје, Охрид, Кочани, Тетово, Велес, Пехчево, Штип, Гевгелија, Кавадарци, Виница, Неготино и Битола. Загрижува и тоа што варијантата го заобиколува имунитетот, па така во периодот од 3 до 9 јануари пријавени се дури 946 реинфекции, што претставува зголемување за 7 пати споредено со претходната недела.

Најмногу се разболувале младите возрасни категории, оние од 20 до 30 и меѓу 30 и 40 години, а најмалку децата до 9 години. Иако во болниците уште нема простор за паника и има слободни места, сепак, тие почнуваат да се полнат со засилено темпо. Моментално на територијата на целата држава хоспитализирани се 351 пациент, што е за 41 процент повеќе споредено со минатата недела. Најмногу од пациентите се на Инфективната клиника во Скопје и во ГОБ 8 Септември.