Претседателот на Република Српска Милорад Додик денеска изјави дека судиите и обвинителите, кои се вклучени во судскиот процес против него, се одмаздољубиви и се обидуваат да ја опустошат Република Српска.

Додик оцени дека судскиот процес против него пред Судот на Босна и Херцеговина, кој се води поради неспроведување на одлуките на високиот претставник во Босна и Херцеговина, не е судска постапка, туку „инквизиција против Република Српска и него лично, поради што процесот ќе се третира исклучиво политички, бидејќи нема факти“.

„Ако Уставот предвидува дека законодавната активност му припаѓа на Парламентарното собрание на Босна и Херцеговина, тогаш е невозможно некој друг да наметне правна норма според која постапуваат судиите и обвинителите“, изјави тој за Радио Република Српска.

Тој повтори дека Судот и Обвинителството на БиХ се „неуставни и незаконски“, бидејќи немаат основа во Уставот на БиХ, наведувајќи дека меѓународната заедница упорно се обидува да ја избегне одредбата со која Република Српска и Федерацијата БиХ се согласуваат при донесување нови надлежности на ниво на БиХ.

Тие имаат основа во наметнувањето што се случи и измамата што се обидоа да ја направат со приказната што ја изгласавме во парламентот, но тоа не е доволно“, рече Додик.

Во октомври 2003 година, Парламентот на БиХ го усвои Законот за Обвинителството на БиХ, кој беше наметнат една година претходно од тогашниот висок претставник.

Додик во неколку наврати најавуваше поведување на постапка за непризнавање на Судот и Обвинителството на Босна и Херцеговина на територијата на РС, но тоа никогаш не се случи.

Главната расправа во постапката пред Судот на Босна и Херцеговина против претседателот на Република Српска Милорад Додик и вршителот на должноста директор на „Службен весник“ Милош Лукиќ за неспроведување на одлуките на високиот претставник е закажана за 22 ноември.