Димитријевиќ: Слушнав дека Партизан не ме сакаше премногу
Репрезентативецот на Македонија, Ненад Димитријевиќ во интервју за српски „Моцартспорт“ помеѓу другото зборуваше и за најавите дека може да го облече дресот на Партизан.
Димитријевиќ игра во одлична форма и во скоро секој натпревар е лидер на Уникс, а одличен беше и во двата настапи за македонската репрезентација против Естонија и Полска. Димитријевиќ се уште не заиграл во Евролигата, а директен контакт со Партизан се уште немало, смета и дека не го сакаат толку многу како што се пишувало во медиумите.
„Не ме контактирал никој од Партизан. Слушнав дека не се премногу заинтересирани за мене. Имаше и други понуди, но не беа конкретни. Уникс покажа желба за мене, како човек и како играч секогаш мора да ја почитувам финансиската понуда која ја имав и спортската улога која ми ја даде клубот. Едноставно, секој играч сака да се почувствува дека е ценет и почитуван“, изјави Димитријевиќ.
Одличната форма во која игра не е случајност.
„Мислам дека се поклопи се во вистински момент…Тимот, соиграчите, тренерот, стилот на игра. Секако и јас како личност созреав. Многу се посветив на индивидуалната работа. Посебно оваа сезона, работам индивидуално и пред и после тренинзите и тоа очигледно дава резултати“, смета Димитријевиќ.