Во Палатата на правдата во Белград денеска имаше вонредно обраќање на главниот јавен обвинител на Вишото јавно обвинителство, Ненад Стефановиќ. Тој проговори пред јавноста по повод обвинението против Владимир Кецмановиќ, таткото на момчето убиец што го изврши масакрот во Рибникар.

Имено, како што рече Стефановиќ на прес-конференцијата, постои оправдано сомнение дека обвинетиот Владимир Кецмановиќ во периодот од една година пред трагедијата го тренирал својот 13-годишен син да ракува со огнено оружје и муниција и да пука во цели во форма на концентрични кругови и силуети на луѓе, да ја пополни рамката, потоа како да стои и да дише при употреба на огнено оружје.

– Во три наврати го однел во стрелачкиот клуб „Партизан практично стрелање“ и еднаш на отворен простор во етничкото село „Гостољубје“ во Мионица и покрај тоа што таквата активност и тренинзи не одговараат на возраста на неговиот син – рече Стефановиќ.

Исто така постои сомнеж дека пријавениот постапил спротивно на одредбите од Законот за оружје и муниција и Правилникот за просторно-технички услови за безбедно чување на оружјето, бидејќи не обезбедил услови за безбедно чување на оружјето и муницијата во метален сеф со клуч.

Владимир Кецмановиќ оружјето го чувал во два пластични куфери кои се користат за транспорт на оружје. Куферите биле во еден црн ранец, така што оружјето и придружните рамки биле спакувани во еден пластичен куфер со брава и шифра, а придружната муниција во друг пластичен куфер без катанец.

– Во истрагата е утврдено дека пријавениот чувал необезбедено оружје во куфери за транспорт на оружје и муниција, наместо во сефот закачен на ѕидот во плакарот во ходникот, кој пријавениот претходно го набавил за да се добие одобрение од надлежен орган за набавка и поседување огнено оружје – рече главниот јавен обвинител.

Пријавениот на тој начин му овозможил на детето да поседува два пиштоли, за кои претходно го обучил да пука во стрелачкиот клуб за чие стекнување и поседување имал одобрение од надлежниот орган.

Момчето убиец го зело оружјето на 1 мај. Тој со себе имал два пиштола и 92 куршуми. Потоа на 3 мај ги ставил во ранец и со себе ги однел во ОУ „Владислав Рибникар“ во кое учел.

– Влегувајќи во приземјето на училиштето, момчето прво пукало во обезбедувачот, а потоа застрелал две ученички кои седеле на дежурната маса, како и уште една ученичка која била пред клавирот – изјави Стефановиќ.

Потоа се спуштил по ходникот до канцеларијата за историја, каде имало наставник по историја, студент по историја на пракса, како и 23 повредени малолетни ученици од VII/2 одделение, во кои испукал вкупно 45 куршуми.

Таму уби шест деца и рани пет деца, како и наставник по историја.

Мајката на момчето, Миљана Кецмановиќ доби кривична пријава за кривично дело Недозволено изработување, држење, носење и тргување со оружје и распрскувачки материи.

-Таа е обвинета затоа што неовластено поседувала муниција со оглед на тоа што во истрагата на еден од куршумите за пиштолот „Ческа збројевка“ била пронајдена нејзина ДНК , поточно на чаура која била пронајдена покрај вратата во кабинетот по историја – рече главниот обвинител на Вишото јавно обвинителство Ненад Стефановиќ.

Тој вели дека инструкторот на стрелиштето дал лажен исказ кога бил сослушан како сведок во истрагата против Владимир Кецмановиќ, со тврдење дека не го видел момчето како пука, дека само еднаш го видел преку видео надзор како притрчал кај татко му кој пукал, и дека потоа лично му наредил да го изнесе детето надвор.

Обвинението е доставено до Вишиот суд во Белград за одлука за потврдување, заедно со предлогот на судот за продолжување на притворот на обвинетиот Владимир Кецмановиќ, како и да го прогласи за виновен по главниот претрес и да го осуди на максимална затворска казна од 12 години.

За Миљана К. обвинителството предложи затворска казна од 2 години и 6 месеци, а за претседателот на стрелачкиот клуб „Партизан“, обвинетиот Ратко И. и инструкторот во тој клуб Немања М. по три години.