Денот на полицијата одбележан со оддавање почит на загинати полицајци во Тетовско
Во рамки на одбележувањето на Денот на македонската полиција 7 мај денеска делегации на институции, политички партии, здруженија, како и семејствата и пријателите ги посетија вечните почивалишта на неколкумина трагично загинати полициски службеници од Тетовскиот регион.
Во кругот на Полициската станица за безбедноста на патниот сообраќај беше положено цвеќе пред спомен бистата на Цоки Стојановски, полицаец загинат во 2001 година.
-Со едноминутно молчење, како и со положување на цвеќе беше оддадена почит за полицискиот службеник Цоки Стојановски кој загина извршувајќи службена должност во 2001 година. Загина на 28 години, а остави зад себе сопруга и две малолетни деца, инфомира портпаролот на СВР Тетово, Марјан Јосифовски.
Со полагање свежо цвеќе почит им беше оддадена и на Сашо Самојловски и Жарко Кузмановски двајцата припадници на специјалните единици на македонската полиција од Тетовско кои загинаа на 9-ти мај 2015 година во акцијата во кумановската населба „Диво насеље” . Колегите му оддадоа почит и на Дано Петрески службеник, крим-техничар кој го загубил животот во полициска акција во Палчиште во 1997 година. Почит со полагање свежо цвеќе Тетово му беше оддадена и на полицаецот Живко Јовановски кој почина во 2014 година во несреќен случај.