Уметниците Ѓорѓе Јовановиќ, Нада Прља, Христина Иваноска и Јане Чаловски учествуваат на групната изложба „Поголем од мене: Херојски гласови од поранешна Југославија“ во Националниот музеј на 21 век MAXXI во Рим. Клучното прашање со кое се занимава групната изложба е „Дали социјалистичкото наследство може да помогне во обновување на концептот на ’јавното добро‘ на просторот на сложената територија што неодамна ја претрпе драмата на граѓанската војна и подемот на национализмот наспроти мултиетничката припадност што го карактеризира овој регион, како и економската криза која влијаеше на цела Европа?“ Кураторка е Зденка Бадовинац од Словенија, а изложбата ќе трае од 5 мај до 12 септември.

Повеќе од 50 уметници, меѓу кои и Марина Абрамовиќ, Сања Ивековиќ, ИРВИН, Желимир Жилник, Давид Маљковиќ, Марјетица Потрч, Милица Томиќ, Марта Попивода и Ана Вујановиќ, Младен Стилиновиќ ја препрочитуваат историјата на регионот преку гестовите на современите херои, поттикнувајќи нови и значајни размислувања за темите на гостопримството и соживотот. Изложбата претставува ново поглавје во програмата на Музејот, која преку редица истражувања посветени на Блискиот исток и Медитеранот, се занимава и со уметничките ферментирања на авторите од земјите од поранешна Југославија со специфичен клуч на интерпретација.

(Текстот е објавен во „Културен печат“ број 79, во печатеното издание на „Слободен печат“ на 8-9 мај 2021)