Претседателот на италијанскиот фудбалски шампион Наполи, Аурелио Де Лаурентис се обидува да ја спаси сезоната од неговата лоша и погрешна одлука да го замени Лучано Спалети со Руди Гарсија.

Италијанските медиуми пренесуваат дека првиот човек на клубот од Неапол денеска ќе има интервју со Гарсија и дека не е исклучена разделба. Наполи е дури петти на табелата во Серија А со 14 бодови, веќе седум помалку од Милан и пет зад Интер, но исто толку голем проблем е што Гарсија е во лоши односи со првите ѕвезди Хвича Кварацхелија и Виктор Осимен.

Се шпекулира дека главни кандидати за клупата на Наполи се Игор Тудор и Греам Потер. Тудор имаше солидни резултати со Олимпик од Марсеј, но како и многумина не се согласуваше со раководството.

Иста е ситуацијата и со Греам Потер, кој е без работа откако го напушти Челси. Англичанецот правеше чуда во Брајтон, но Челси не беше средина за неговата филозофија. Се споменуваше и Антонио Конте, но некако повеќе гледа кон клупата на Рома, бидејќи на „тенок мраз“ е и Жозе Мурињо.

Што се однесува до македонскиот репрезентативец Елиф Елмас, тој до сега не добива не добива голема минутажа во редовите на Наполи. Во Серија А најмногу играше против Џенова, вкупно 45 минути, а дури три натпревари од шампионатот ги гледаше од клупата за резерви, последниот во неделата во домашниот пораз од Фиорентина.