Веб-страниците на неколку дански политички партии беа цел на кибер напади денес, еден ден пред локалните и регионалните избори, за кои проруските хакери ја презедоа одговорноста.

Веб-страниците на Конзервативците и Црвено-зелената алијанса беа накратко недостапни во понеделник наутро, објави Euractiv.

Копенхаген пост, онлајн весник кој известува за дански прашања на англиски јазик, исто така имаше проблеми.

„Драги читатели, нашата веб-страница моментално не работи и ја прикажува пораката „502 Bad Gateway“. Данската агенција за одбранбено разузнавање нè информираше дека веројатната причина е напад „Distributed Denial of Service“ (DDoS), а нашето известување за локалните избори на 18 ноември нè направи цел“, соопшти медиумот во објава на Инстаграм.

DDoS нападите го оневозможуваат пристапот до веб-страница со преоптоварување на нејзините сервери со сообраќај.

Проруската хакерска група „NoName057(16)“ објави на социјалните медиуми дека ги таргетира веб-страниците на неколку дански политички партии и јавниот радиодифузен сервис DR.

Сепак, DR рече дека не се регистрирани инциденти што би влијаеле на нормалното работење.

Истата група минатата недела ја презеде одговорноста и за сајбер нападите врз неколку дански општини, владини веб-страници и компанија за одбрана.

Во анализата на ризикот пред локалните избори на почетокот на ноември, данската разузнавачка служба предупреди на висок ризик од кибер напади, наведувајќи дека проруските хакерски групи веројатно ќе извршат DDoS напади врз веб-страници поврзани со изборите.