Американскиот претседател Доналд Трамп во неделата ги отфрли тврдењата дека САД се соочуваат со недостиг од муниција во војната со Иран, уверувајќи дека земјата има повеќе оружје одошто ѝ е потребно. „Волстрит џурнал“ претходно објави дека планираните двонеделни напади биле одложени поради страв од дополнително празнење на резервите на „патриот“, „томахавк“ и пресретнувачите „СМ-3“.

Белата куќа смета дека објавувањето податоци за потрошените ракети може да ја загрози националната безбедност. По демантот, Трамп на „Трут соушл“ сподели фотографии создадени со вештачка интелигенција, на кои американски авиони го бомбардираат иранскиот остров Харг, а тој самиот е прикажан зад американски бомбардер како „чувар на светот“.

Сепак, во заднината се наоѓа огромната потрошувачка на муниција во војната со Иран, анализира „Би-би-си“.

Во речиси 40 дена интензивни операции во рамките на „Епски гнев“, како и во нападите што следуваа, САД потрошиле оружје во вредност од десетици милијарди долари. Американската влада проценува дека војната досега чинела 37,5 милијарди долари, главно поради употребените ракети и друга муниција.

До воспоставувањето на кревкото примирје на 8 април, американските сили погодиле повеќе од 13.000 цели во Иран, додека противвоздушната одбрана пресретнала над 1.700 ирански дронови и балистички ракети. Според „Њујорк тајмс“, Трамп добил совет да не го проширува конфликтот бидејќи дополнителната ескалација би ги истрошила американските резерви.

Претседателот јавно негира дека постои недостиг и тврди дека САД имаат повеќе муниција од која било друга држава. Хегсет, сепак, побара дополнителни 87 милијарди долари за надоместување на „критичниот недостиг“ во Пентагон.

Точната состојба на американските резерви е воена тајна, но процените на Центарот за стратегиски и меѓународни студии покажуваат дека обновувањето на арсеналот ќе биде бавно. Во зависност од видот, за производство на една ракета се потребни од една до пет години. Дури и ако средствата бидат одобрени веднаш, новите проектили би биле испорачани дури по неколку години. Ракетите што американската војска ги добива денес, на пример, главно биле нарачани и финансирани уште во 2023 година.

Особено голема била потрошувачката на крстосувачки ракети „Томахавк“, кои се лансираат од бродови и од подморници кон оддалечени и добро заштитени цели. Се проценува дека во војната биле испукани повеќе од 1.000 вакви ракети, чија најнова верзија чини околу 2,6 милиони долари. Пред конфликтот, САД имале над 3.000 ракети „томахавк“, а сега располагаат со околу 2.000. Ако планираните нарачки бидат одобрени, резервите би можеле да се вратат на претходното ниво дури во 2031 година.

Претставничкиот дом усвои воен буџет од 1,15 билиони долари — САД ќе ја прошират соработката со Израел

„Патриот“ од 4 милиони долари за дрон од 20.000 долари

Уште позагрижувачка е состојбата со системите „Патриот“. Од проценетата предвоена залиха од 2.330 пресретнувачки ракети, во конфликтот можеби биле употребени дури 1.430. Една ракета „патриот“ чини околу четири милиони долари, а честопати била користена против ирански дронови вредни само меѓу 20.000 и 50.000 долари. Иако системот е ефикасен, ваквата разлика во цената покажува колку е неодржливо скапи ракети да се користат за соборување евтини беспилотни летала.

Биле потрошени и значителни количества ракети од понапредниот систем ТХААД, кој пресретнува балистички проектили на поголема височина. Американскиот тинк-тенк ЦСИС проценува дека од предвоената резерва од околу 360 ракети биле употребени меѓу 190 и 290. Во светот постојат само девет оперативни батерии ТХААД, од кои седум се американски. Ако трошењето продолжи, САД би можеле да останат без доволно средства за одбрана од балистички закани од Русија, Кина или за Северна Кореја.

Можниот конфликт околу Тајван ја загрижува Америка

Недостигот предизвикува особена загриженост поради можниот конфликт околу Тајван. Американските стратези со години предупредуваат дека Кина би можела да стане способна за инвазија до 2027 година. Во евентуална војна во Пацификот, американската војска би се соочила со огромен кинески арсенал од авиони, балистички и хиперсонични ракети, како и со масовни роеви дронови. Дел од аналитичарите затоа сегашната состојба ја опишуваат како „прозорец на ранливост“, во кој САД немаат доволна длабочина на резервите за долготраен конфликт.

Други експерти сметаат дека употребата на оружјето не претставува само слабост. Со покажувањето дека е подготвен да го употреби својот арсенал, Вашингтон испраќа порака до противниците и ја зајакнува моќта на одвраќање.

Брзото уништување на дел од иранските воени капацитети, според ова гледиште, претставува предупредување и за Кина. Сепак, намалените резерви директно ја погодуваат и Украина, која итно бара дополнителни системи „Патриот“ за одбрана од руските напади. САД произведуваат само околу 60 до 65 вакви ракети месечно, додека, пак, 803 биле употребени само во првиот ден од операцијата против Иран.

„Иран претрпи многу поголеми загуби“

Американските власти засега уверуваат дека нема непосредна опасност од целосно празнење на арсеналот. Причината не е тоа што резервите се неограничени, туку што Иран претрпел многу поголеми загуби. Американските и израелските напади значително ги оштетиле неговите фабрики и способноста масовно да произведува ракети и дронови.

Последните американски операции се насочени и кон намалување на иранската способност да им се заканува на бродовите во Ормускиот Теснец.

Во меѓувреме, Вашингтон бара поевтини пресретнувачки системи и побрзо производство, свесен дека соборувањето евтини дронови со милионски ракети не може долгорочно да продолжи.

Америка ги засилува нападите врз Иран — војната досега ја чинела 37,5 милијарди долари