Доктор Никола Пановски на Фејсбук објави дека вчера доживеал несреќа, во која за малку можел да загине.

Несреќата се случила возел велосипед и паднал на пешачки премин, пред џип кој чекал прв на семафорот. Возачот на џипот не го видел и тргнал, при што малку недостасувало да го прегази. Д-р Пановски вели дека психички е во шок, а има и физички болки. Тој упати апел до возачите додека се на семафор, да гледаат пред нив, а не во мобилниот телефон.

„Се испружувам раширен со сите четири на асфалтот, јас напред со рацете, а велосипедот поназад заедно со моите нозе. Таман почна да ми тече крв од нос и се спремав да се исправам, кога шок. Џипот тргнува и ме покрива, таман е толку висок што само ми ја допира мојата голема глава, но ме стиска силно на десниот колк и на десната нога. Јас се дерам, а и многу луѓе кои чекале на пешачки. Џипот запира и по две секунди (кои траат како вечност), се враќа назад. Не ме прегази само затоа што прво со неговото лево предно тркало го прегази задното тркало на велосипедот, па рамот, кој ми ја стисна десната подколеница која беше под рамот. Значи, осети отпор и прикочи, инаку јас ќе бев смачкан, а возачот на џипот и да не беше осуден, ќе беше душевно осакатен доживотно“, пишува д-р Пановски во објавата.