ЦЈЗ алармира: Расте бројот на заболени, повеќето се од британски сој, можен е трет бран
Директорот на Центарот за јавно здравје Беким Зекири во изјава за „Слободен печат“ информира дека бројот на позитивни случаи на ковид-19 е во пораст.
-Во мојот центар бројот на анкетирани е во пораст, а во пораст е и бројот на позитивни на коронавирус. На последниот состанок со Комисијата за заразни болести бевме информирани за геномот на вирусот, односно утврдено е дека станува збор за доминација на британскиот сој. Има опасност повторно работите да излезат од контрола и да се соочиме со трет бран, кој можеби ќе биде причина за нови рестриктивни мерки, но тоа го следи Комисијата за заразни болести. Моја препорака е да не се опушта населението, да нема никакви групирања, и редовно да се одржува хигиена, вели Зекири.
Тој нагласува дека населението мора да работи на зголемување на свеста за почитување на мерките за самоизолација и изолација, бидејќи според него голем е бројот на издадени решениеја, и дури и да не може полицијата да постигне со проверка на домовите, секој треба да биде свесен за опасноста што ја шири.
-Решенијата за изолација ги издава ДСЗИ, по претходно направено анкетирање поради добиен позитивен тест за коронавирус. Потоа полицијата дејствува, но верувам дека не е лесно да се контолираат сите кои се во изолација, бидејќи бројот е навистина голем, и не е како на почетокот кога имаше мал број заразени. Затоа секој треба да го почитува издаденото решение за изолација, предупредува Зеќири.