Националната мрежа против хомофобија и трансфобија го најави овогодинешното издание на „Парадата на гордоста“, кое ќе се одржи на 24 јуни.

Како што наведоа организаторите, почетната точка, како и досега, ќе биде во паркот „Жена-борец“, каде во 17 часот ќе започне собирањето на учесниците, а во 19 часот, по кратките поздравни говори ќе започне протестниот марш по скопските улици, според истата рута како и минатите години. Тој ќе заврши со културно-музичка програма на стадионот на АРМ во Градскиот парк.

„Напредокот на полето на правата на ЛГБТ+ луѓето не е изедначен, ниту пак е доволен, а постојано е соочен со напади од сили кои се противат на универзалните човекови права. Токму затоа, Прајдот останува важна форма на протест на ЛГБТ+ заедницата против стигмата, предрасудите и насилството“, велат од Националната мрежа.

Ирена Цветковиќ се осврна на актуелниот контекст и загрижувачки силното негативно мобилизирање на верските заедници, конзервативните и популистичките политичари и партии, како и антиродовите движења против ЛГБТИ заедницата, „особено против најранливиот и најмаргинализираниот дел од заедницата, нашите транс браќа и сестри“.

„Во ваква непријателска средина кога говорот на омраза и насилствата се во пораст, а хомофобијата и трансфобијата стануваат доминанта позиција на носителите на моќ, да се биде Горд и Гласен претставува отпор и протест против системот кој угнетува. ЛГБТИ заедницата минала низ многу тешки периоди, ќе минеме и низ овој само со исправена глава, горди и гласни во остварувањето на нашата визија за свет на еднаквост и просперитет“, рече Цветковиќ.