Талибанските власти во Авганистан уапсија четворица локални претставници на најголемата германска владина организација за помош, соопшти денеска германското Министерство за економска соработка и развој.

– Ние многу сериозно ја сфаќаме ситуацијата и работиме преку сите наши канали за да обезбедиме ослободување на нашите колеги, истакна портпаролката на Министерството за економска соработка и развој.

Германската агенција за меѓународна соработка е во сопственост на германската Влада и работи во околу 120 земји ширум светот, нудејќи проекти и услуги од областа на „економскиот развој, промоција на вработувањето, енергијата и животната средина, како и мирот и безбедноста“.

Талибанците се на власт во Авганистан од 2021 година, откако силите на НАТО и САД се повлекоа од земјата. Многу странски мисии, вклучително и Амбасадата на Германија во Кабул, ги затворија своите канцеларии. Талибанците првично ветија поумерен пристап отколку за време на нивното претходно владеење од 1996 до 2001 година, но постепено го наметнаа шеријатот.