ФОТО: Бронза за македонската таеквондистка Рељиќ на Европското првенство У21 во Букурешт
Како што информираа од Македонската Таеквондо Федерација, нашата земја се закити со медал од Европското првенство У21 во Букурешт, Романија.
Ова е четврти медал за македонското таеквондо на европските првенства до 21 година.
Најдобрата спортистка во Македонија, Мила Рељиќ во категоријата до 62 кг. успеа да го освои бронзениот медал.
На стартот Рељиќ со 2:1 ја совлада Дора Местровиќ од Хрватска, потоа во осминафиналето триумфираше со 2:1 против Дафне Стаму од Грција.
Во четвртфиналето македонската таеквондистка со 2:0 ја совлада Јулија Шпак од Полска, а со истиот резултат во полуфиналето загуби од Вивиана Мартон од Унгарија.
Во оваа категорија со злато се закити токму В. Мартон, „сребрена“ е нејзината сонародничка Луана Мартон, а бронзи имаат Рељиќ и Ирене Монтемуино од Шпанија.